Жаңалықтар

03.05.2017
Балғын арулар бақ сынады

Аудандық мәдениет үйінің балалар әдіскері Тайбек Мұқашевтің айтуынша, биыл екінші рет өтіп отырған шараның мақсаты ұлттық құндылықтарымызды өскелең ұрпақтың бойына сіңіру, «қызға қырық үйден тыйым» көрсеткен ұлтымыздың қыз бала тәрбиесіндегі ерекшеліктеріне баса назар аудару. Алғашқы бөлімде байқауға қатысушылар өздерін таныстырды. Алғашқы 4 қатысушы таныстыруды мәнерлеп айтса, бесінші боп сахнаға шыққан №3 Қарауылкелді орта мектебінің қатысушысы Мирна Ержан ғана әуенді таныстыруымен көрерменді еліте білді. Десе де, қазылар алқасы қатысушылардың жас ерекшеліктерін ескеріп, балғын аруларға бірін асырып, бірін түсіріп, баға қоймай, барлығына бірдей жоғарғы бағаны көтерді. Ондағы мақсат алғашқы аяқалыстарынан-ақ, қатысушылардың мысы басылып қалмай, бәсі биік болсын дегені еді.
02.05.2017
Мектептегі бірлік мерекесі

1 – мамыр Қазақстан халықтарының бірлігі күні мерекесіне орай №3 Қарауылкелді орта мектебінде директордың бастауыш кластары жөніндегі орынбасары Г. Собалованың ұйымдастыруымен «Қазақстан – бірлік пен татулықтың мекені» атты мерекелік шара өтті. Шараның мақсаты көпұлтты Қазақстан Республикасының халықтар достығы – еліміздің бірлігінің кепілдігі екендігін таныту. Әр халықтың өнері, оның рухани байлығының негізін баланың жүрегіне өз ұлтының тілін, дінін біле отырып, өзге ұлттың рухани байлығын сыйлауға, құрметтеуге тәрбиелеу. Мерекелік шара сайыс түрінде болды. Сайыста 1 сыныптар және мектепалды даярлық топтары өзара бақ сынады.
02.05.2017
ЕЛ БІРЛІГІ НЫҒАЙҒАН КҮН

Қазақстан Республикасы Рәміздерінің 25 жылдығына орай, 1 - мамыр Қазақстан халықтарының бірлігі мерекесінде Қазақстанда тұратын әртүрлі ұлт өкілдерінің өнері мен мәдениетіне, халықтар бірлігіне құрметпен қарау, еліміздің тәуелсіздік жолында халықтар достығының дамуына үлес қосу аясында «Бір шаңырақ астында» атты халықтар достығы фестивалін өткізді.Фестивальға аудан орталығындағы барлық ұжым қатыса отырып, әр ұлттың киімдерін киініп, мерекелік шеруге шықты.
28.04.2017
РУХАНИ ЖАҢҒЫРУ — ЗАМАН ТАЛАБЫ

Елбасымыздың биылғы Жолдауы еліміздің үшінші жаңғыруына арналғаны белгілі. Алғашқы жаңғыруымыз Тәуелсіздікке қол жеткен тұста болған болса, екінші жаңғыру Елордамыздың Астана қаласы болуынан кейін жүзеге асты. Әуелгі мақсатымыз дамыған елу елдің қатарына қосылу еді, ендігі мақсат озық отыз елдің ортасынан ойып тұрып орын алу. Осыдан бірнеше жыл бұрын Нұрсұлтан Назарбаев «Қазақстан -2030» атты стратегиялық жоспарын жариялап, бұл межеге уақытынан бұрын қол жеткізген едік. Озық 30 елдің сапына 2050 жылға дейін енуіміз керек деген мақсатымыз айқын. Ол үшін бізге инновациялық жаңашылдық қажет. Экономиканы көтеру, теңгенің тұғырын бекіту секілді әлі де атқарар шаруа шаш етектен. Одан қалды халықаралық деңгейдегі шараларға қатысып қана қоймай, ондай шараларды өз жерімізде ұйымдастыру біздің елімізді әлемге танытып, өзге жұрттың бізбен санасуына, мойындауына әкеледі. Мысалы, биыл өткен Универсиада, маусым айында басталатын «ЭКСПО2017» халықаралық көрмесі осы сөздеріміздің дәлелі.
28.04.2017
Биылғы сынақ бұрынғыдан өзгерек

Биылғы түлектер 2 рет сынақ тапсырады. Әуелгісі мектептегі қорытынды аттестаттау болса, кейінгісі жоғары оқу орнына түсуге ниетті талапкерлерге арналған сынақ. Мектептегі емтихан формасы бұрынғыдай тек қана тест тапсырмаларынан тұрмайды. Биылғы түлектерге ана тілінде эссе жазу, Қазақстан тарихынан ауызша жауап беру мүмкіншіліктері қарастырылған. Тест түрінде өтетін сынақ түрі алғаш енгізіле бастаған тұста оқушылардың сөйлеу, өз ойын білдіру мүмкіншіліктері шектелді деген пікірлер айтылғанды. Енді міне, сол олқылықтың орны толғалы тұр. Эссе жазу арқылы білімі мен ойын қағаз бетіне түсірсе, төл тарихымызды ауызша баяндамақ. Есепті жазбаша шығарып, таңдау пәнінен тест тапсырады деп көзделіп отыр. Бұл сынақ процесінің барлығы оқушының өз білім ұясында өтпек. Ал, сынақтың келесі кезеңі Ұлттық Бірыңғай Тестілеу сынақ орталығында өтеді. Жоғары оқу орындарының грантына талас осы жерде басталады. Тестілеу орталығына арнайы өтініш білдірген талапкерлердің барлығының мүмкіншіліктері тең. Яғни, «Алтын белгі» мен үздік аттестат иегерлері өзгелермен бірдей сынақ тапсырады. Үздік бітірген оқушының бұл әлеуеті тек грандқа үміткер қатарласымен ұпайы тең болған жағдайда ғана пайдаға аспақ. Еліміздегі басты білім бәсекесі біздің ауданда қалай жүзеге аспақ? Талапкерлер мен ата – аналар не білуі керек? Міне, осы және өзге де сұрақтарға аудандық тестілеу орталығының жетекшісі Дәмет Толжанова жауап бермек.
27.04.2017
Бесінші басымдық - қауіпсіздік пен сыбайлас жемқорлыққа қарсы күрес

Елбасы Нұрсұлтан Әбішұлы Қазақстан халқына тағы да бір Жолдауын арнады. Қай кезде де Жолдаудан жақсылық күтетін халықтың үміті бұл жолы да ақталғаны анық. Елбасы Н.Ә. Назарбаевтың «Қазақстанның үшінші жаңғыруы: жаһандық бәсекеге қабілеттілік» атты жолдауы Ащы селолық округінде және Байғанин аудандық оқушылар үйінде талқыланды.Жиында баяндамалар оқылып,пікірлер айтылды. Бесінші басымдық қауіпсіздік пен сыбайлас жемқорлыққа қарсы күрес Мемлекет басшысы 5 институттық реформа және Ұлт жоспары аясында институционалдық қайта құруларға баса назар аударған болатын. Оның ішінде мемлекеттік басқарудан бастап, сот және құқықтық жүйелерді жаңғыртуға да мейлінше мән берілді. Елбасы Жолдауында бұл басымдық аясында ЭЫДҰ-ның озық тәжірибелері мен ұсынымдарын имплементациялау жұмысын қамтамасыз ету міндеті жүктеліп отыр. Және бір мәселе - жекеменшікті қорғауға, құқық үстемдігіне және баршаның заң алдында теңдігін қамтамасыз етуге бағытталған реформалар.
27.04.2017
«МЕН – ЧЕМПИОН»

Жақында аудандық білім бөлімі әдістемелік орталығының ұйымдастыруымен мектеп оқушылары арасында «Мен – чемпион» спорттық сайысы өтті. Жарысқа ауылдық округтерден 136 –ға тарта бала қатысты. Яғни, 17 команда өз бақтарын сынады. Сайыста спортшылар эстафета, кім жылдам?, баскетбол, секірмекпен секіру, скейтборд және финалдық эстафета бөлімдері бойынша жүйріктіктерін, жылдамдықтарын, ептіліктілерін көрсетті. Салауатты өмір салтын серік еткен оқушылар жарыста бар күштерін салды. «Мен – чемпион» ойындарының қатысушылары жарыс алаңында аянбады.
26.04.2017
Жүлделі оралған жеңімпаз қыздар

Жуырда Темір ауданында 2002 2007 жылы туылған қыздар арасында дзюдодан аудан кубогы өтті. Оған Байғанин жасөспірімдер спорт мектебінің құрама командасы қатысып, жүлделі орынға ие болды. Олар жеңіспен оралды. Атап айтқанда Әлия Көлбаева 48 келі салмақ дәрежесі бойынша жүлделі ІІ орынға ие болса, 35 келі салмақта күрескен Бейбіт Қуанғали мен Гүлназ Кәдірхан ІІІ орынды иемденді. Дзюдошы қыздардың жаттықтырушысы Ж. Әбдіғалиеваның айтуынша қыздар барын салып күресті, намысқа тырысты, әлі талай белестерді бағындырады деген сенімін білдірді.
26.04.2017
Қаби Мәуешовты еске алған күн

Киелі сахнада алғашқы болып өнер көрсеткен Оймауыт халық театры Бәкір Тәжібаевтың «Ана жүрегі» қойылымын алып шықты. Соғысқа дейінгі өмір мен соғыс кезеңіндегі қойылым көрерменді еріксіз баурап алды.Шыбын жанын шүберекке түйген ана мен Арманның жары Гүлімнің образы көзге жас үйірте әкетті.
25.04.2017
Жемқорлықты жою жолдары

Өткен аптада аудандық орталықтандырылған кітапханада «Сыбайлас жемқорлыққа қарсы әрекет жолдары: Адам. Қоғам. Мемлекет» тақырыбында дөңгелек үстел өтті. Мақсат сыбайлас жемқорлық ұғымы туралы жастарға түсіндіру, қоғамдық қасіретке әкелетін материалдық құндылықтар дағдарысынан шығу, қарсы әркеттер табу жолдары туралы жастардың құқықтық сауаттылығын арттыру. Дөңгелек үстелге аудан әкімінің орынбасары Ш. Спанова,аудандық персоналды басқару бөлімінің басшысы О. Қошанов, аудандық мәслихат депутаты Г. Елеуова, аудандық ішкі саясат бөлімінің бас маманы Қ. Аққожа, «Нұр Отан» партиясының аудандық филиалының маманы Н. Ералин, «Нұр Отан» партиясы аудандық филиалының сыбайлас жемқорлыққа қарсы іс – әрекет комиссиясының мүшесі Ә. Бөлтеев, аудандық ішкі істер бөлімі бастығының орынбасары Б. Карин, аудан әкімдігі аппаратының ұйымдастыру және құқықтық жұмыстар бөлімінің заңгер кеңесшісі М. Сержан, Жастар ресурстық орталығының заңгері Н. Қартеменова және мемлекеттік қызметкерлер, ұстаздар, оқушылар, жас мамандар қатысты.
25.04.2017
Ақпараттық топ мүшелері халықпен жүздесті

"Халықтың қауіпсіздігін қамтамасыз ету" жобасының бесінші бағыты бойынша ауданға арнайы жұмыс тобы келді. Топ мүшелері ауыл - аймақты аралап, жиын өткізді. Ащы, Көлтабан, Қопа ауылдық округтерінің Ноғайты, Жарлы, Қораши, Ебейті елдімекендерінде және аудан орталығында болып, стратегиялық маңызы бар құжаттардың басты тұстары мен бағыттарын түсіндіріп, тәуелсіздік жылдарында қол жеткен табыстарымызды насихаттады. Топ құрамында Ақтөбе ауылшаруашылық колледжінің директоры, облыстық мәслихат депутаты Аманкелді Есіркепов, Ақтөбе қалалық қоғамдық кеңестің мүшесі, формация ғылымдарының кандидаты Құдайберген Бекенов, Қазақстан жазушылар одағының мүшесі, гуманитарлық ғылымдар магистрі, айтыскер ақын Есентүгел Әзи және топ жетекшісі облыстық ішкі саясат басқармасының бас маманы Еркеназ Мырзахановалар бар.
24.04.2017
Теолог маманмен кездесті

Аптаның екінші күнінде Ақтөбе қалалық мешітінің әйелдерге арналған сауат ашу орталығының жетекшісі Талшын Қожахметова Зарқымқызы аудан мекемелерінде қызмет ететін қыз – келіншектермен кездесті. Кездесудің мақсаты «Халықтың қауіпсіздігін қамтамасыз ету» жобасының әйел теологы ретінде халықпен жұмыс жүргізу. Аудандық Б. Тәжібаев атындағы саз мектебі ғимаратында өткен жиында Талшын ұстаз қазіргі қоғамдағы діни ахуал, жастар арасындағы ажырасу, ене мен келін арасындағы келіспеушіліктерге мысал келтіріп, осындай келеңсіздіктерді болдырмау мақсатында қалалық мешіт жанынан ана, ене, қыз бала мектептері ашылғандығын айтып өтті. Сонымен қатар, жас ұрпаққа берілетін тәлім – тәрбиені қатаң қадағалап, әрбір ата – ана балаларына дұрыс бағыт - бағдар беріп отыру керектігін айтты. Теолог маман жиынға қатысқан қыз – келіншектердің қойған сұрақтарына шариғатымыздан мысалдар келтіре отырып, тұщымды жауап берді. Бұдан басқа ислам діні турасында мағлұматтар айтылып, ата – бабамыздан келе жатқан салт – дәстүрімізді ұстанып, салтымыздан қашпай, шариғатымыздан аспайық деген тұжырым жасалды.
24.04.2017
Елбасы мақаласы талқыланды

Елбасының «Болашаққа бағдар: рухани жаңғыру» мақаласын аудан активі де талқыға салды. Өткен аптада аудан әкімдігінің мәжіліс залында өткен алқалы жиынға аудандық мекеме, бөлім басшылары, мәслихат депутаттары, ардагерлер мен жастар ұйымдарының өкілдері, зейнеткерлер, кәсіпкерлер қатысты. Аудан әкімі Асқар Шериязданов мақаланың жаһандану процесінің кесірінен төніп тұрған қауіптерден құтылу мақсатында түзілген стратегия екендігін айтып, еліміздің болашағын, барар бағытын ұғыну үшін аталмыш мақаланы бірнеше рет оқып шығуға кеңес берді.
24.04.2017
«ТУҒАН ЖЕРГЕ ТАҒЗЫМ» аясындағы кездесу

Ауданға арнайы келген жерлесіміз Тілектес Тоқсанбаева мектеп оқушыларымен, мұғалімдермен жүздесті. С.Бәйішев атындағы Ақтөбе университетінің қазақ тілі мен әдебиеті кафедрасының меңгерушісі, филология ғылымдарының кандидаты, доцент Тілектес Жаңабергенқызы Қарауылкелді орта мектебінің түлегі. Бүгінде еліміздің ғылым саласына өзіндік үлесін қосып жүрген жан, ана тіліміздің ғана майталманы емес. Өзінің айтуынша, ағылшын, қытай, өзбек, ұйғыр тілдерін еркін меңгерген. Кездесу барысында сана мен білім турасында оқушыларға мол мағлұмат беріп, болашаққа бағдар жасауларына өзіндік үлесін қосты. Тілектес Жаңабергенқызы әуелі өзі түлеп ұшқан ордаға бас сұқса, кейін Т.Жармағамбетов атындағы орта мектептің шәкірттерімен кездесті.
21.04.2017
Ауданға рухани инвестиция тартылмақ

Өткен аптада аудан әкімі Асқар Шериязданов білім бөлімі қызметкерлері мен мектеп директорларын жинады. Ондағы мақсат ауданнан түлеп ұшқан түлектердің тізімін түзіп, әр салада табысты еңбек етіп жүрген жерлестеріміздің алған білімдері мен жинаған мол тәжірибелерін ел игілігіне пайдалану.

Беттер